Հունգարիայի մայրաքաղաք Բուդապեշտում այսօր տեղի կունենա շախմատի համաշխարհային 45 –րդ օլիմպիադայի բացման հանդիսավոր արարողությունը:

Մրցանակների համար պայքար կմղեն ռեկորդային թվով ՝ տղամարդկանց 193 և կանանց 181 թիմեր:

Մեծ շուքով կնշվի մարզաձևի միջազգային ֆեդերացիայի հիմնադրման  100 –ամյակը: Կկազմակերպվի ցուցահանդես, որի ընդգրկուն ծրագրում նախատեսված են վիկտորինաներ, միաժամանակյա խաղի սեանսներ, սիրողական մրցումներ, կոնֆերանսներ և այլն:

Մասնակիցների  ուշադրությունը չշեղելու, խաղացողներին չխանգարելու նպատակով կազմկոմիտեն արգելել է էլեկտրոնային սարքերի օգտագործումը:

Շախմատի հարուստ ավանդույթներ ունի Հունգարիան: Հիշենք թեկուզև նշանավոր գրոսմայստերներ Յանոշ Պորտիշին և Պոլգար քույրերին: Նրանցից ամենահայտնի ՝  Յուդիթի անվան  հիմնադրամը  միջոցառումներ կկազմակերպի պատանի և տարեց շախմատասերների համար: Ցանկացողները կստանան նաև Պոլգար քույրերի ինքնագրեր:

Արժե նշել, որ Հունգարիան դեռևս 1926թ. ընդունել է շախմատի համաշխարհային երկրորդ ՝ ոչ պաշտոնական օլիմպիադան:

Կազմկոմիտեն  միջազգային ֆեդերացիայի  մեկդարյա  հոբելյանի առթիվ ներդրել է նորարարական տեխնոլոգիա. զգայուն խաղատախտակներ, գերարագ անլար ցանց, հոլոգրամներ և այլն:  Համաշխարհային 45 –րդ ստուգատեսը նաև  կանաչ օլիմպիադա է հանդիսանալու, քանզի հյուրանոց – մրցավայր երթուղում կլինեն միայն հեծանիվներ, էլեկտրամոբիլներ, և, բացի այդ, չի գործածվելու թուղթ ու  պլաստիկ իրեր: Այդ ամենի համար կազմակերպիչները  նախատեսել են 16, 6 մլն. ԱՄՆ դոլար:

Առաջին տուրի ծրագրով մասնակիցները վաղը կնստեն  խաղասեղանների շուրջ:   Մրցողների թվում են նաև Հայաստանի թիմերը:

Տղամարդկանց հավաքականի գլխավոր մարզիչ Արման Փաշիկյանը մրցավայր է ուղեկցել գրոսմայստերներ  Հայկ Մարտիրոսյանին, Շանթ Սարգսյանին, Գաբրիել Սարգսյանին, Ռոբերտ Հովհաննիսյանին և Կարեն Գրիգորյանին։

Կանանց համակազմը ղեկավարում է  Զավեն Անդրիասյանը:  Մեդալների համար կպայքարեն Լիլիթ Մկրտչյանը, Մարիամ Մկրտչյանը, Էլինա Դանիելյանը, Աննա Սարգսյանը և  Սուսաննա Գաբոյանը։

Հավատանք, որ մեր երկրի պատվիրակները հաջողությամբ կզարգացնեն շախմատի հայկական դպրոցի հարուստ ավանդույթները: